1 Timothy 5

1To daɓo n minagyi yi n zayi n wo kwo hon, ama daɓo n woi peceiye ngye oho dada, da ɓo n na za nawyi yi ngye oho azaje ye-ye yi. 2Zhin anyikwoza anyigbakwoyi ɓo ngye oho aya, aɓi anyikwoyi n gye oho amapui, hoi zhin nubo manayi n ɓa tukwo.

3Ikklisiya kwo shi anyikwoza bwa n oɓa aɓa n kufi, ndei ɓato n zayi lo n wo ɓa zhin. 4Ama ngye ɓa n na ɓiyi lo kwo ayawyi, oɓanu ɓa bma ɓa zhin, gama kwo bmiya ɓemana zhin kwa ya na api nu. Hoi bma a zakwoyi awyekwoyi zhin. Ɓo nu n kwo da Shekwoyi n mwa.

5Ikklisiya kwo bma a nyigbai zhin n ɓato n nyahoi n, ɓai to na zayi lon, ndei ɓa kmi awye shi Shekwoyi ɓai zhin aduwa n esai vinya. 6Ama to ge ɓai gyi esa, ɓai zan laɓa, ɓai zhin agnagbain, kwo ɓai da aza ɓon, ɓai zan anyi gmada shin ga ɓahin, n lonu ɓai wu ɓahin wyewyeyi n. 7Deye kwo la ze ofye ikklisiya wyidna n na bai aviyi ɓa kpe, ɓa zhin oɓo n kwo bmiya.

8Ama oza n wo to kula n wo azai esa n ɓa gyi san, tun baga aza n ɓa fi n oza puwan, woto n iko yi lo wa ci ge wo zhin Yesu viyi nun. Oza deye pya wo du tna viyi lo n nukwoyi.

9Nyigbayi n wo cei pma pma wa ze ikklisiya tnu-tnu-yi, wo to kasa n na aye shitnayi n, woi bwa mula pa bwa zun gmanyi. 10Azai dawo ɓeda manayi ntu n wo atnu-tnu manayi ɓo n wo ku zhin, woku owo aɓi shi n bmiya? Woku ɓemana zhin a zhiɓei n na a Yesu viyi ajeyi? Wo ku bma a nyasan yi zhin n na bugba wunyi? Wo n cei pma n sai vinya wa zhin ɓemana?

11Anyigbai n ɓa to kon, ɓato filo n ɓon, gama esa fyewyi sai ɓa pa mula n jesun ɓa na ɓa alkawali ɓo n ɓa zhin Kristi nyi. 12Ntuce nu ɓaku zunkni ntuge ɓato shi ɓa alkawali kmisunyi bwan. 13Nko avun, kwoi wulo ɓa wo bwato, ɓa gyi esa ɓai laɓa ɓai vi apuwa, ɓai zhin agnagbai, ɓai fi aza aɓo abwa. 14Ntu cenu mi gye kwo bmiya lo anyigbayi a nawyi ɓa senu njesun, ɓa ma aɓi ɓa shi ɓahin puwa, n lonu ata da ɓeda nukwoyi tu ɓa tukwon. 15Gama edna wo milo azaho n ɓami ɓala awye pmiya n ikklisiya, shetan n la ɓa dna kwoce.

16Ma paho n jesun nge, nyigbai azanu ɓa shiwo bwa, ɓato fa deye n ikklisiya akun. Ikklisiya ɓa wu agyiwye kpe anyigbai tukwo nu nɓa to na zahoyi lon, kwo aɓa yi n ɓa ɓa kpe awye shi ɓan.

Fye Shi A tnu-tnu Yi Bwa Nbmiya

17A Pasto nɓa zhin tnu-tnu cewo n bugbai gmanyi, a gbaɓa dei-dei, a ciɓa dei-dei, tun baga aza n ɓa nyi-wye da waʼazi zhin n nyawu yi. 18Gama Shekwoyi ɓeda gna ge, “To pa jaki egbe esa n kwo gni kwoi dna awyi n cein, fakwo kwa gyi kwoi gwo tnu-tnu lo.” Nna abado njesun kwa ci ge, “Tnu-tnu yi gwo lo n wo ladayi.”

19To wo gnunu-gnunu tu Pasto tukwon, sai dei n aseida da lo ngun aba kwo ngun ata ɓa zun wo kni. 20Ndei wo ku laifi zhin, a gnakni wo n eklisiya abye vinya, n na abai n zaho ta viwo zokwon.

21Mi ga ho wyidna ye n Shekwoyi abye n Dagayi Yesu Kristi yi, n wo a amalaika a Gyi-gyi-yi, fya zhin lonu kwo pasto yi zhin ho nungundo nu kwo to woi zhin ho nungundon. Fye zhin aza ɓo gmanyi. 22Awyeto ya fye n Pasto kniyin, sakun fya ze owo alaifi pita, kwa ze ngye fya pui ɓa nya nu. 23(Deye to ci ge ho to ye zhin eje to won nun, kwo bmiya lo ha towo nsahoi gama kwo zhin, shigbe nu n ho aba, shi nyasan ta faho nyin.)

24Pa ge aza ho, har n na a Pastoyi ɓa se-ase fi n laifi azai kpe. Nna aɓeye pya ho ɓa mi ha zhin ɓoho. Ama n na a ɓoho, nyipyei wada nya nu ɓei kpe gaiciya anya ya. 25Elonu zaho-zahoi kpe lo ngye shi a pasto ho zhin ɓemana, ama ata kpe oɓa ɓemanayi ɓo n saho yim, sai esa la mwa.